глас 2
Песнь 1
Ирмос: Во глубине постла иногда фараонитское всевоинство преоруженная сила, воплощшееся же Слово всезлобный грех потребило есть; препрославленный Господь славно бо прославися.
Святый великомучениче и целебниче Пантелеимоне, моли Бога о нас.
Приступль усердно ко Христу, прежде скончания, еже о Христе, мертвеца первее воздвигл еси. Ныне же мя, пребогате, умерщвлена греховным угрызением, твоими молитвами, о Пантелеимоне, оживотвори.
Святый великомучениче и целебниче Пантелеимоне, моли Бога о нас.
Возсия, якоже звезда, нося в юности старостный и Богомудрый разум, добротою же тела благолепие души стяжав, препрославленному Слову явился еси прекрасен.
Святый великомучениче и целебниче Пантелеимоне, моли Бога о нас.
Умертвився миру и во Христа, блаженне, одеявся банею Крещения, был еси богоносен орган и приятелище действа Духу, всем угождая, всех уврачуя недуги.
Святый великомучениче и целебниче Пантелеимоне, моли Бога о нас.
Премудрость сестру себе притворив и причастник жизни ведом, от нея почтился еси и венцем дарований украсился еси, Божественныя зари, блаженне, облистая светлостию.
Пресвятая Богородице, спаси нас.
Благословеньми, Пресвятая Чистая, естество, удалено преслушанием бывшее от Зиждителя, Христа рождши, венчала еси и тления свободила еси. Темже, радующеся, вси, вернии, Тя ублажаем.
Песнь 3
Ирмос: Процвела есть пустыня, яко крин, Господи, языческая неплодящая, Церковь пришествием Твоим, в нейже утвердися мое сердце.
Святый великомучениче и целебниче Пантелеимоне, моли Бога о нас.
Словеса Духа услышав, был еси яко земля добрая и благоплодная, приемый семя многоценно и родивый, треблаженне, спасение душам.
Святый великомучениче и целебниче Пантелеимоне, моли Бога о нас.
Умертвил еси мудрование змиина угрызения и душу оживил еси, богодохновенно возродився и Царю всех предстоя.
Святый великомучениче и целебниче Пантелеимоне, моли Бога о нас.
Посрамил еси безбожное мучителей повеление и ко Христу притекл еси, вместо всех Сего стяжав, и был еси, Богомудре, великий купец.
Святый великомучениче и целебниче Пантелеимоне, моли Бога о нас.
Матере твоея благочестие возлюбль, славне, отчее же возненавидел еси безбожие многомятежное, яко имея разум, лучшее избрал еси.
Пресвятая Богородице, спаси нас.
Носяй Божественным мановением всю тварь, Господь на руку носится Твоею, Дево. Егоже ныне моли избавити от бед поющия Тя.
Седален, глас 4
Добляго страдальца благочестия Христова восхвалим светло Пантелеимона, вернии, псалмы, и пении, и песньми духовными, имже мучительство невидимаго врага силою Божественною попрася и недугов исцеление богатно от Господа даровася творящим верно Божественный и честный праздник его.
Песнь 4
Ирмос: Пришел еси от Девы не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.
Святый великомучениче и целебниче Пантелеимоне, моли Бога о нас.
Последуя Владыце любовию, расточил еси богатство нищим, себе обнажая к страданию, еже и прошел еси, вечныя надежды провидев.
Святый великомучениче и целебниче Пантелеимоне, моли Бога о нас.
Хваления Богу жертву принесл еси, яве возгнушався идольских треб, все же шатание нечестивых, страстотерпче, попрал еси.
Святый великомучениче и целебниче Пантелеимоне, моли Бога о нас.
Снедаемым завистию и гневом боримым, непоборимую силу сим представил еси, мучениче, и победил еси злочестивое томление, вооружився.
Святый великомучениче и целебниче Пантелеимоне, моли Бога о нас.
Иже старца Симеона руками держимый, старца тя глаголы, Пантелеимоне, улови к Божественному разумению и ко многих спасению и избавлению.
Пресвятая Богородице, спаси нас.
Мужныя и девы во след Тебе потекоша, Деву и Отроковицу Тя и Матерь зряще, едина бо обоя во едино собрала еси несказанно, Богоневесто.
Песнь 5
Ирмос: Просвещение во тьме лежащих, спасение отчаянных, Христе, Спасе мой, к Тебе утренюю, Царю мира, просвети мя сиянием Твоим, иного бо разве Тебе, бога не знаю.
Святый великомучениче и целебниче Пантелеимоне, моли Бога о нас.
Радостно подвиги подъял еси мучения, огражден силою Божественною, и, терпением твердо мучения подъемля, радуяся, вопиял еси: иного бо, разве Тебе, бога не знаю.
Святый великомучениче и целебниче Пантелеимоне, моли Бога о нас.
На подвиг борьбы вступив, блаженне, Божественною силою превозмогл еси безбожных нечестивое тиранство и неистовство идолослужения, облекся во Христа, Судию и Венчателя подвигов.
Святый великомучениче и целебниче Пантелеимоне, моли Бога о нас.
Юношеско ты противление имея и твердостию души возставление стяжав, всяку язву доблественне претерпел еси, и мужеским, блаженне, умом, благодатию Божественнаго Креста укрепляемь.
Святый великомучениче и целебниче Пантелеимоне, моли Бога о нас.
Несогласное отрину вещание заблуждших, Небесным учением страдалец и многим спасению преславну бысть виновник, Твоим действом, Христе, укрепляемь.
Пресвятая Богородице, спаси нас.
Речения премудрых, и гадания вся, Препрославленная, и пророк проречения Тя проображаху проявленно напоследок быти Божию Родительницу, иныя бо, разве Тебе, чистыя не знаем.
Песнь 6
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Святый великомучениче и целебниче Пантелеимоне, моли Бога о нас.
Идолы лестныя оплевал еси и возносимую прелесть упразднил еси, чудодействуя дивная и творя исцеления, Богомудре.
Святый великомучениче и целебниче Пантелеимоне, моли Бога о нас.
Венечник показался еси, всеизрядне, сквозе бо огнь ты прошел еси и воду, и, на колеси протязаемь, преславно погубил еси безумныя.
Святый великомучениче и целебниче Пантелеимоне, моли Бога о нас.
Мучителей суровство низложив, неудобь носимая биения телесная душевною крепостию, пострадал еси, Богомудре, благодатию.
Пресвятая Богородице, спаси нас.
Содержай концы земли, яко Бог, Твоими, руками, Чистая, держится описанием тела, Иже Божественным зраком неописанный.
Кондак, глас 5
Подражатель сый Милостиваго и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоня присно борца соблазны от вопиющих верно: спаси ны, Господи.
Икос
Безсребреника память, добляго страдальца, вернаго целебника, благочестно воспоем, христолюбцы, да приимем милость, паче же оскверншии, якоже и аз, своя храмы, душам бо и телом, возлюбленнии, исцеления подавает. Потщимся убо, верная братия, в сердцах наших имети его крепость, избавляюща от лести вопиющия: спаси ны, Господи.
Песнь 7
Ирмос: Телу златому премудрыя дети не послужиша, и в пламень сами поидоша, и боги их обругаша, среди пламене возопиша, и ороси я Ангел: услышася уже уст ваших молитва.
Святый великомучениче и целебниче Пантелеимоне, моли Бога о нас.
Законно стражда и победив врага, пристанище благоутишно сущим в мори, славне, обуреваемым был еси, свет же сущим во тьме жития, и пети научил еси: благословен Бог отец наших.
Святый великомучениче и целебниче Пантелеимоне, моли Бога о нас.
Блажен еси, и добро тебе есть ныне, преблаженне, восприимшему пребогатную и блаженную надежду твою, уготованную верою Господеви зовущим: благословен Бог отец наших.
Святый великомучениче и целебниче Пантелеимоне, моли Бога о нас.
Святых души, и праведных лицы, и Безплотных чини Ангельстии прияша сликовника тя, блаженне, мечем бо усечен быв во главу, поеши, радуяся: благословен Бог отец наших.
Пресвятая Богородице, спаси нас.
Оружие, еже прежде древа животнаго нас отлучившее, ныне, обращаемо, приемлет знаменавшияся Кровию, из ребр Сына Твоего изшедшею, Пренепорочная. Благословена еси, Бога плотию рождшая.
Песнь 8
Ирмос: В пещь огненную ко отроком еврейским снизшедшаго и пламень в росу преложшаго Бога пойте, дела, яко Господа, и превозносите во вся веки.
Святый великомучениче и целебниче Пантелеимоне, моли Бога о нас.
Благоприятное твоея хитрости душевное ослепление отчее исцеляет, подающее свет верою, преблаженне, притекающим и ко Спасу Христу наставляющее.
Святый великомучениче и целебниче Пантелеимоне, моли Бога о нас.
За Христа заклан быв, к вечней жизни преминул еси и Богозванен явился еси именованием Божиим, Богомудре. Тем почитаем тя и превозносим Христа во веки.
Святый великомучениче и целебниче Пантелеимоне, моли Бога о нас.
Витийское отложив лютое мудрых глумление, Христовым призыванием болезненных страстей корения посекаеши, исцеляя превозносящия Христа во веки.
Пресвятая Богородице, спаси нас.
Безсмертия зарю вемы источника Тя, Богородице, яко рождшую Слово Безсмертнаго Отца, всех смерти избавляющаго, превозносящих Его во веки.
Песнь 9
Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.
Святый великомучениче и целебниче Пантелеимоне, моли Бога о нас.
Преставился еси, радуяся, к желанию конечному, идеже вселився, преблаженне, блаженный конец приити воистину сподобился еси, сый со Владыкою твоим во веки безконечныя.
Святый великомучениче и целебниче Пантелеимоне, моли Бога о нас.
Желание получил еси и любве твоея исполнение, каплющей еще теплей крови, за Христа излиявшейся, от Негоже, радуяся, приял еси венцы подвигов твоих.
Святый великомучениче и целебниче Пантелеимоне, моли Бога о нас.
Львов уста и зверей зияния, икоже Даниил древле, ты обуздал еси, весть бо стыдетися, мучениче, добродетели и безсловесное естество. Темже тя, преславне, сошедшеся, ублажаем.
Святый великомучениче и целебниче Пантелеимоне, моли Бога о нас.
Богатную благость тебе Христос дарует, сокровище исцелений нам даруя и всемилостива изволением тя подав всякому скорбящему, и пристанище тихое, и предстателя, и защитителя.
Пресвятая Богородице, спаси нас.
Яко руно, Всенепорочная, дождь Небесный во утробе заченши, нам родила еси тишину Дающаго яко Бога Того поющим и Тя, Всепетую Богородицу, проповедающим.
Светилен
Милостивную твою душу провиде Бог, Пантелеимона тя проповеда, безсребрено бо требующим исцеление источаеши, святе, мучителей свирепство терпением твоим победивый.
